ضابط لأحد المواطنين: اختنقت كل ما إرفع إيدي ع إبني وخيي وإختي وبيي وإمي

  • مقالات
ضابط لأحد المواطنين: اختنقت كل ما إرفع إيدي ع إبني وخيي وإختي وبيي وإمي

كتب المواطن رودريغ مطر على صفحته على فايسبوك قصة مؤثرة تروي مأساة الجيش الذي وضعته السلطة في مواجهة الشعب اللبناني.

" حاجز عالـNDU

وصل دوري

شب لحالي

وقاف ع جنب...

وقفت، قرب العسكري وقلي بدي عزبك طفي السيارة وانزال، سألته عن السبب، قلي من بعد اذنك هيدا شغلي انزال...

قلتله تكرم عينك...

فتش السيارة وشاف ٤ أعلام لبنانية، وقلي بدي آخدن...

قلتله صعبة، ما بتدق فيهن، علي صوتي ولو بدا تصير مجزرة ...

وصل الظابط ومعه كم عنصر وقلي بكل إحترام، رح ناخد الأعلام...

قلتله في علمين صغار مكتوب علين، بدي عزبك تقرا شو مكتوب.

أول علم مكتوب إسم تيو سالم وجملة بالفرنسي: je t'aime mon pays Liban

تاني علم مكتوب إسم رودي سالم وجملة بالعربي: هيلا هيلا هووو الجيش اللبناني منحبوا

سكت للحظة وعلا راسو وقال بس لو فيي ...

قلته لو فيك شو؟

تقلن معقول وقف لبناني حامل علم لبنان وصادر العلم؟

تقلن عم نقمع شعب لبناني من حقه التظاهر للقمة عيشي؟؟؟

تقلن اختنقت كل ما إرفع إيدي ع إبني وخيي وإختي وبيي وإمي؟

هو عم يطلع فيي وحابس دمعته، قلتله أنا بفهم وجعك، وبعرفك فهمان وجعي، خود الأعلام ما في عندي غير مشكلة وحدة وهي شو بدي قول لولادي بكرا لما آخدهن مشوار؟ الجيش اللبناني أخد الأعلام مني؟ شو بدي أعطين سبب وهني بيعرفوا العلم ورمزيته والنشيد ومعناته والجيش وشو شغله...

فكرت بسؤال إبني الكبير، بابا اذا الجيش يلي بيحمي لبنان من الغريب ومن إنه يرفع علم غير العلم اللبناني، ليش بدن ياخدولنا علمنا؟

وقلي فيك تفل، طلعت بالسيارة وفليت...

المصدر: Kataeb.org