بالأبيض علامة الرجاء والقيامة، يحتفل ظهر الخميس بالصلاة لراحة نفس ماتيو علاوي، نجل الأب مجدي، في كنيسة مار الياس أنطلياس ثم ينقل جثمانه الى مدافن سيدة ماريتيم جبيل.

وأصرّت عائلة الفقيد على الحاضرين الالتزام باللباس الأبيض.

وقد نعى الأب هاني طوق ماتيو فكتب عبر فيسبوك:"

ولاه يا صبي بكرت كتيير

كسرت قلب بيك صديق العمر وصبتنا بالصميم

يللي رافق طوبيا البار يرافقك وسلم عل الاحبا.

اول ما طليت عا هالدني كنت اول مين حملك عا ايدي وبشرت بيك انو اجاه صبي،

اليوم ما قدرت اطَّلع بعينيه ولا قدرت قلو شي، هو قللي، اديشك يا هالبي جبار".

 

بدوره، كتب الأب بيتر حنا:

"قدّام حرقة قلب البَي، شو فينا نقول؟!

سمّيت مؤسستَك "سعادة السما"..

الهيئة، ما فيه غير السما رح تعطيك السعادة..

شو قاسية هالأرض يا أبونا..

خبار كتير، وناس كتار..

بس كلو رح يفل، بس تبقى الليلة وحدك عمخدتك..

عم فكر، شو ممكن تفكر..

عم فكر كيف ممكن توعا..

أنا بَيّ.. عم جرب افهمك..

شو قاسية هالأرض يا أبونا..

رجّعت ناس من موت المخدرات..

رجعتن من حضن اليأس..

رجهتن لأهلن..

قديش طعميت، وعم تطعمي كل يوم، ناس وولادن..

مش مزبوط تعمل معك هيك الأرض..

شو قاسية هالأرض يا أبونا..

ما تزعل..

فيه سما.. وفيه الله..

ما تزعل.. المسيح قام يا أبونا".