كتبت الاعلامية ديما صادق تعليقا على خطاب الشيخ نعيم قاسم:

"أصلا إسرائيل هي كانت حتضرب"
طيب، حامشي معك جدلاً بنظريتك ، انتو عملتو ضربة استباقية ، ممتاز.
بس يا عيني الضربة الاستباقية بتنعمل لتفشل مخطط العدو بالهجوم ، او عل اقل لتخفف فعاليته، مش لتزيدها اضعاف! 
يعني : 
بال ٦٧ إسرائيل كانت عارفة انه عبد الناصر عم يحشد بسينا استعداداً لحرب، قامت فاجئته هي انها بلّشت الحرب وكرسحته كلياً. 
بال ٧٣  السادات كان عارف انه في جو حرب ، قام هو فاجأ اسرائيل بفترة هني معطّلين فيها، يوم الKippour ، وعبر خط برليف واربك الجيش الاسرائيلي جدياً. 
نفس الشي عمل حافظ الاسد بالجولان.
هول ضربات استباقية. 
انت بحزب الله شو عملت بكل " ضرباتك الاستباقية" ؟ 
بال ٢٠٠٦ هبطت الدنيا فوق راسنا وخلليت الإسرائيلي يستشرس بشكل غير مسبوق باعتراف نصرالله نفسه "لو كنت اعلم". 
بحرب الإسناد اجتاحك الإسرائيلي و اخد ٥ نقاط ودمر البلد واغتال كل  قياداتك. انت بالمقابل وين أربكته ؟ فرض عليك كل شروطه وقلّك بدّك تسلم سلاحك وانت قبلت تسلمو جنوب الليطاني. 
اليوم، ال ٦ صواريخ اللي ضربتهم بشو اربكو الإسرائيلي؟ كيف قلبو المعركة لصالحك؟ كيف خففو من وحشيته؟ شو استفدت منهم غير انهن زادو وحشية الإسرائيلي عليك وأعطيت مبرر للعالم بيغض النظر زيادة عن استفراد الإسرائيلي فينا ؟ 
لك إذا هاي ضربة استباقية شو استفدت منها غير انك زدت الوحشية الاسرائيلية عليك و الشحار والتعتير ع ناسك ؟؟؟؟ 
لا فاهم شو هو منطق الضربة الاستباقية، ولا في شي أصلا بأكد انه إسرائيل كانت حتفوت لو شو ما صار، يعني لا منطق عسكري ولا منطق سياسي وفوق هيك مربح العالم جميلة هبلك وشحارك وارتهانك لإيران!!!