كتب الكاتب والممثل طارق سويد على صفاحته على مواقع التواصل الإجتماعي، رسالة صغيرة، تختصر معاناة شعب عانى ومازال يعاني منذ عقود. وجاء في رسالة سويد:
"من لما كنت طفل صغير، بسمع الكل حواليي عم بقول "ما في متل لبنان، لبنان احلى بلد بالعلم" من لما كنت طفل صغير حفظت هالعبارة و حسيت فيا بقلبي و صدقتا...و كتار متلي ربيو عم يسمعو هالعبارة و عبارات متلها، و صارو يرددوها و حسو فيا حتى... انا اللي بتذكرو من طفولتي، حرب ودبابات وقتلى وجثث، وامي عم تركض فينا عالملجأ، حاملاتنا بين ايديها. المعلمة فايتة عالصف وعم تطلب مني قدام الكل ما اجي بكرا عالمدرسة اذا اهلي ما سكرو القسط. توفى بيي نحن و صغار، وامي عم تعمل المستحيل لتقدر تطعمينا وتعلمنا بأجمل بلد بالعالم، وذكريات ابشع بكتير ما بحب اتذكرها حتى...ضمان ما عندي، استشفا ما عندي اذا صرلي شي، متلي متل القسم الاكبر من الشعب. اليوم وصلنا لمطرح وصلولو قسم كبير من اللبنانيي قبلنا، وعاشو حياتن كلها بهل مطرح، يمكن بكرا خبز ما عنا..بشو لبنان اجمل بلد؟ اذا بطبيعتو خربناها من كتير زمان، و مش الطبيعة اللي بتعمل بلد، الشعب اللي بيعمل بلد.. بشو لبنان اجمل بلد بالعالم؟ بشعبو اللي بيلحق زعيمو بس لأن بصلي متلو، وعلناً بقول خبو عليه ابن طايفتي هيدا؟ بشو لبنان اجمل بلد بالعالم؟ بالتنوع والاختلاف؟ وقفو كذب، طول عمرو هالواقع والإختلاف، هوي سبب حروب وقتل و كراهية و خلاف.. بشو لبنان اجمل بلد بالعالم؟ بالسلاح المتفلت او الرصاص الطايش او التعصب والكراهية بين الناس؟ بالقعدة عالشمعة والكهربا المقطوعة والمي اللي مننطرا مرة بالجمعة؟.. اخواتي تنيناتن هاجرو، متلن متل كتار من اللبنانيي لأن ما لاقو مطرح الن باجمل بلد بالعالم، وعم نكبر ونعيش الحياة بعاد عن بعض.. ولا مرة الا و ما شحدنا اقل حقوقنا شحادة، رغم انو مندفع حقا اضعاف و اضعاف، ولا مرة حصلنا عليا.. بفهم كتار عبالن يضلو مصدقين الكذبة اللي ربيو عليا وما بلومن، وبعرف انو كتار متلي وعيّو من زمان انو منا الا احلام وشعارات رنانة..الحقيقة بتوجع وبشعة ايه، بس و لا مرة عإيامي كان لبنان اجمل بلد بالعالم..
طارق."